第三章 夏慤道帐篷少年

呢件事发生喺上年佔领运动既时候。

当时全城既话题焦点都集中係三个不同区既佔领上面。差唔多每一个反对政改、支持真普选既后生仔都会去现在支持，阿恆当然亦都唔例外。虽然阿恆冇带埋个帐篷去过夜，但佢每隔两三日都会过金钟坐下参加集会，同d人分享下自己既意见，有冲突既时候就企係雨伞一边同班警察对垒。

喺整段佔领期间，阿恆特别深刻既情况应该都有两次，第一次係第一日发放催泪弹，当时阿恆就係马路既人群中心，吸入催泪弹果种辛苦同刺鼻既感觉佢仲记得好清楚。至于第二次，就係学联宣布「行动升级」果晚。

记得果阵外界对学联都已经冇乜信心，不过阿恆都係抱住「信多你一次」既心态参加集会，反正当时政府同佔领人士陷入胶着状态，有任何突破都总好过冇。到左夜晚九点几，学联班人终于宣布要包围政总，阿恆跟住其他人赶过去龙和道，开始左成晚流流长既攻防战。

阿恆身型虽然唔係好似身边d阿叔咁肥斯大只，但佢始终有踢开波同做开运动，四肢同身体都有d肌肉，係后生仔黎讲都算係精壮果一班。有时见到警察想冲过黎，阿恆都会企係最前线用遮挡住佢地，保护住后面d人。

成晚龙和道不断被清场，又几次再被佔领返。去到凌晨三四点大家都开始有d攰，阿恆亦都坐左係地下休息，但都有周围望实睇下会唔会有咩突发情况。附近既人係度整理紧自己既装备，有几个男仔帮手搬紧铁马去巩固返d防守线。阿恆望住其中一个瘦瘦地既男仔，个样好似得16、17岁左右，着住一件写住「kr」既。阿恆心谂，唔知佢係咪中学生，都留到好夜喎。

突然佢见到对面有几个差佬对住呢个男仔指指点点，阿恆觉得唔对路，所以企左起身。当个男仔将铁马搬到最前面，整紧个位置既时候，果几个差佬突然跑过黎郁手，尝试将个男仔拉走。阿恆大嗌「喂，学生你地都搞！！」吸引其他人注意，自己就跑过去帮手。好彩跑到既时候见到个男仔仲拉住个铁马挣扎紧，班警察仲未得手。阿恆一手揽住个男仔，另一边尝试推走d警察。班警察见到男仔有帮手，即刻大嗌又拎d警棍出黎敲打d铁马黎吓人，其中一个凶神恶煞既差佬见拉唔走个男仔，索性拎起支警棍想大力打落个男仔度。阿恆手快，见到就即刻成个人挡住个男仔，但背脊同手臂就已经被击中几次。呢个时候其他黄丝都已经走到过黎帮手，另一波推撞又再开始发生。

阿恆趁混乱拖住个男仔离开前线。去到后少少一个安全d既地方，阿恆问个男仔：「喂你有冇事？有冇整亲？」

个男仔摇摇头话：「我冇事，唔该你呀。」

阿恆「嗯」左一声，但见个男仔件黑色t已经乱晒，就伸手帮佢整一整返好件衫。个男仔近睇望落原来更加瘦，一头黑色短髮两边产青，只手同手臂虽然未到骨忏忏，但都已经係冇乜肌肉，如果头先俾警棍大力打落去可能骨折都似。係昏暗既街灯之下，佢黄白色既皮肤有少少擦伤，但唔係咩大碍。阿恆见佢已经冇乜事，于是叫佢去急救站消下毒，然后自己就走返去前线铁马果边帮手。

今次冲突维持左十几分钟，阿恆返黎既时候发觉个男仔已经唔见左，但都冇特别上心。佢觉得佢始终係男仔，俾警察搞果一次应该会小心d，唔会有事。

直至天光，警察既清场行动都有继续，阿恆虽然有帮手但都阻止唔到佢地清返龙和道甚至係上面既添马公园。到左朝早情况稳定返，天桥已经成为警察地头，阿恆都已经攰到死死下，俾警棍打到既地方又开始隐隐作痛，于是佢决定返屋企休息同清洁一下，之后再返黎。

到夜晚，阿恆训左一阵有返精神之后又再去返夏慤道。可能经过琴日既失败，今晚既人好似多左少少，但主要既目的都係喺大台附近闹学联做左一个错既决定。阿恆冇心机听自己人同自己人闹交，于是佢係佔领区周围行下，睇下有咩特别野。

行到去公民广场对出既天桥底，突然有人係后面叫住佢。

「喂。」

阿恆另转头，以为撞倒边个朋友，但原来係一个唔识既人。望真d係个头髮产青，着住黑色t，卡其色七分裤，踢拖既男仔。黑色t写住一句熟悉既「kr」。

「喔，你係琴日个...」阿恆见到件衫上面d字，终于记得佢係琴日搬铁马个男仔。

「係呀，我叫小岚。琴日多谢你呀。」个男仔笑左笑。

「唔洗。我叫阿恆呀。」

「过唔过黎坐下？」小岚挥手叫阿恆过去。阿恆见冇咩野做，就走埋佢同佢一齐坐左係一个橙色既帐幕隔离。

「个营你架？」阿恆指住问。

「係呀，我同d同学夹钱买，佢地有时都会过黎过夜，但主要都係我係度训。」

原来小岚真係个中学生，今年中六。虽然今年佢要考dse，但都决定每晚过黎呢度训，撑真普选。通常小岚日头就keep住有返学，放学返屋企沖个凉执下野，就会黎到佔领区自修室温书，夜晚就係呢个营入面训到第二朝。佢由差唔多十月头开始已经係度留守，差唔多有九成日子都会係度过夜。

「哇...你屋企唔会担心你咩？点解佢地又会俾你日日出黎训？」阿恆有d奇怪。

「其实佢地唔俾架。不过我同屋企人关係一直都好差，佢地都理